Kryetarja e Lëvizjes Socialiste për Integrim, Monika Kryemadhi, ka qenë sot e pranishme në ceremoninë e inaugurimit të shtatores në Tropojë, në krah të demokratëve.
Kryemadhi është ulur në rresht të parë krah Fatmir Mediut, Lirie Berishës, Sali Berishës, Lulzim Bashës, bashkëshortes së tij Aurela Basha e deputetes Rudina Hajdari, vajza e Azemit, e ulur për herë të parë në karrigen e ligjvënëses.
Me anë të një statusi ne rrjetin social “Facebook”, Kryemadhi shprehet se Azemi do të kujtohet gjithmonë si politikani i cili nuk u tremb asnjëherë nga pengesat dhe vështirësitë , duke mos hequr dorë nga betejat e tij.
Postimi i plotë
“Rruga drejt demokracisë ka pengesat e veta dhe Azemi ishte një nga ata që i kapërcente ato. Herë me lehtësi, herë me vështirësi. Por ai nuk u tremb kurrë nga pengesat. Dhe prandaj sot pas kaq shumë vitesh kujtohet ende si politikani guximtar që nuk hoqi kurrë dorë nga betejat e tij.”